ماهانت العشره ولانتي تهونين
بس الزمان اليوم قاسي ومقلـوب
قدرك على راسي وشايلتك العين
وظروفي صوب وحبك انتي بعد صوب
مابيك تشكيلي ولا ابيك تبكيــن
مافينا لا طالب ولا فينا مطلـوب
قبل لا تبكي لي شوفي محجر العين
من دمعي الي لا جا طاريك مسكوب
الجسم ناحل كني ما اكلت شهرين
ووجهي تغير شكله وصار مشحوب
ماشفت لا راحه ولا خاطري زيـن
نوبن على اوراقي وعلى بابكم نوب
واقف واطالع فيك لا جيتي تمشين
ودي اضمك بس يـادوب يـادوب
ارد نفسي عنك واقول بعديـن
وارجع وانا ندمان والقلب مكروب
واحيان باسمي اسمع انك تنادين
وارد انا لبيه وانساح واذوب
واصحى واقول الله وينه وانا ويـن
كني بعد ما فقت فالوجه مضروب
تنور بي الدنيا في طلتك والين
وفي غيبتك نور القمر عني محجوب
انا اليتيم الي فقد ناس غالين
وانا الاسير وعايش اليوم مغصوب
لاني عشيقن صار بين اختيارين
يا اما الهوى والحب والا اني اتوب
انا اعرف انا صعبه نصير زوجين
وعشق الحرام ذنوب وذنوب وذنوب
والمشكله فالدين يامصعب الدين
ف ان كنت تغلب غيرك تصير مغلوب
لاصرت تشرب كاس غيرك هذا بين
بكره ترى كاسك مع الناس مشروب
وشي اخذته دون شرع وقوانين
حقك لدار الوقت بيصير مسلوب
وابليس لا جا الشين سواه لك زين
ولا تدري الا للمتاهات مسحوب
ولا يتبعه ياكود ناسن مساكين
جهالتن فالدين وضعيفه قلوب
تمشي ورى دربه وترجع مولين
ماضني الهم عن عذاب الله هروب
قلبي يعاني مثل ما انتي تعانيـن
وفراقنا مقدر فالاوراق مكتوب
للحب يابنت الاوادم قوانين
واخلفتها يوم اعشقك وابغي اتوب