يوميات زوج معاصر ( هتعجبكم موووووووت)

--------------------------------------------------------------------------------
الحلقة الاولى (يوم الزفاف)
احمد وغاده واول يوم بعد الزفاف
المشهد بعد مادخلوا شقتهم

[size=4]غاده
أخيرا بقيت فى شقتى – عشى الصغير احساس جميل ان يكون للبنت بيت خاص اختارت فيه كل ركن وكل جزء على ذوقها الخاص تعمل فيه زى ما هى عايزه وتحس فعلا انها ملكة متوجة – اخيرا انتهت الترتيبات والمشاوير والسهر والخناقات علشان فرش هذا العش الرائع الصغير – اخيرا انتهى ضجيج الفرح وتفحص المعازيم فى كأنى هابطة من المريخ وكل واحدة من عواجيز الفرح تمصمص شفايفها وتقول ( مش كانت بنتى احسن ؟ ) – تعبت جدا من حمل الفستان الثقيل والحذاء الضيق – سبحان الله هو كل احذية العرايس بتكون ضيقة ليه ؟ واخيرا اخيرا ح اكون لوحدى – ايه ده
احمد جوزى بينده
بيقول ( مدام احمد اجمعى عندى بالخطوة السريعة ) !!! مدام ؟ انا يا بيه ؟؟

- ايه يا ستى سرحانة فى ايه ده كله ؟؟؟ هو علشان مفيش حد فى جمالك النهاردة يبقى خلاص ؟ لا يا هانم انا لما انده عليكى تيجى قبل ما انده مفهوم ؟ وبعدين فين القطة علشان ادبحهالك
-انت عاوز تاكل قطط النهاردة ولا ايه ؟ لو دبحتها ح اطبخهالك فورا
- تطبخيها ؟!! بنات اخر زمن يعنى مش خايفة منى ؟
- لا مش خايفة فرحانة جدا وانت ؟
- انا أسعد انسان فى الدنيا .... اول مرة بنتكلم انا وانتى من غير الف عزول
فى بيتنا الجميل بجد البيت رائع ذوقك طلع يجنن يا غاده لما كل حاجة اتفرشت واجمل ما فيه ان حبيبتى فيه – لا لا مفيش كسوف خالص خلصنا الحدوتة دى – شوفى انا باقول علشان ربنا يكرمنا فى حياتنا نصلى انا وانتى ركعتين نبدأفيهم حياتنا علشان ربنا يبارك لنا كل خطوة ماشى ؟
- ماشى يا حبييبى ........
- حبيبى؟!! لا يا ستى قومى غيرى هدومك واتوضى احسن كده مش مصليين خالص !!

قمت ودخلت اوضة النوم ومش عارفه اول ما دخلتها ارتجفت ؟؟ الله يسامح كل البنات اللى رعبونى لما اتجوزوا ليه يعنى هى حرب ؟ انا مش ح افكر فى حاجة علشان ما اديهاش عياط من اولها ...

يا خبر ايه كل الجيبونات اللى فى الفستان دى انا كنت شايلة حديد زى المصارعين مش فستان ... لازم يعذبوا البنات فى كل حاجه والله حرام الغلب ده ... غيرت الفستان باعجوبة وارتديت عبايه جميلة مطرزة ولم أجرؤ ان ارتدى الطقم اللى وصتنى ماما انى البسه فى اول يوم ... العالم دى بتهرج أكيد !!!
اتوضيت فى حمام غرفة النوم وشلت مكياج الفرح
وسيبت شعرى علشان يشوفه احمد
وخرجت له لأجده غير البدلة ولبس البيجاما اللى أوصانى العالم كله انى اهديهاله وكأن الجوازة هتفشل لوالعروسه مجبتش لعريسها بيجاما يوم الزفاف
لقيته بيبصلى بصه كلها اعجاب وحب واستقبلنى مهللا ( انا عرفت دلوقت ليه الحجاب فرض لو كنتى بتخرجى بشعرك الجميل ده كانت حصلت مظاهرة .. يالا يا ستى نصلى أحسن كده مش ح ينفع خالص !!
وصليت وراء احمد جوزى لأول مرة وحسيت احساس رائع ان احمد جوزى هو الامام وان الله شاهد علينا واحنا نبتهل بين يديه ان يرزقنا السعادة والتوفيق ودعا احمد دعاء طويل وأمنت عليه وانا أدعو من قلبى ان يحقق الله كل كلمة فيه وان يكون زوجى الحبيب حبيبا طول العمر والا يفرقنا الا الموت والا يدخل الشيطان بيننا ابدا ..

وانهينا الصلاة وقعدنا واحتضن احمد ايدى وحطها فى ايده لأول مرة فارتجفت وظهر على ارتباكى وصاحبنى خوفى واسترجعت كل الحكايات المفزعة اللى بسمعها من أغلب البنات
وواضح ان خوفى كان ظاهر على وكأن احمد قرأ أفكارى لقيته يحنو على ويقول :
ايه يا غاده الرعب ده كله .. ايه يا حبيبتى هى حرب؟
ما تخافيش من اى حاجة خالص وسيبك من الاوهام دى وحواديت البنات الفارغة ... لو كان الارتباط مفزع كده ما كانش الاسلام سمى الليلة دى ليلة البناء - يعنى الزوجين بيبنوا حياتهم فى الليلة دى- وكان سماها ليلة الحرب العالمية مش كده ويا ستى علشان تطمنى انا عاوز اتكلم معاكى واستمتع ان انا وانتى لوحدنا لأول مرة وبعدين كل حاجة تيجى على مهلها ماشى يا قمر ؟

حسيت زى ما يكون جبل واتزاح من على صدرى وشكرت تفهم احمد ورقته المتناهية واتكلمنا فى حاجات كتيررر كأن طوال عمرى متكلمتش وكان أعذب حديث حسيت بيه فى حياتى انا بتكلم مع جوزى حبيبى وفتحت له قلبى وسقط حاجز الخجل منى وفتحت قلبى وأخرجت كنز المشاعر التى كنت أخبؤها من يوم ان تشكلت أنثى الى اليوم وأعطيتها الى الرجل الذى ارتبطت به وحسيت بشلال من المشاعر الفياضة
وشيئا فشيئا سقطت الرهبة و الحواجز بيننا وتحدثت القلوب والعيون و....................... سكتت شهرزاد عن الكلام المباح.................

--------------------------------------------------------------------------------
الحلقه التانيه

صحيت من النوم وانا معرفش انا فين واقعدت أتفحص المكان بدقة وانا بدور على حجرتى القديمة مش لقياها وشفت احمد نايم جنبى على لسرير فافتكرت اجمل يوم فى حياتى
.. ومفيش لحظات ولقيت جرس التليفون بيرن خرجت من الاوضه على طراطيف صوابعى علشان مصحيش احمد حبيبى... لقيت ماما زى ما توقعت (الحمد لله انها مكنتش حماتى !!! )

- صباح الخير يا ست العرايس صباحية مباركة .

- صباح النور يا حبيبتى .

- انا ما نمتش خالص قلقانة عليكى .....

- انا الحمد لله كويسة ( اه لو الامهات تبطل القلق ده )

- !!!!..... طيب ياغاده احنا ح نيجى لك بعد الضهر شوية

- تنورى يا ماما ....

طبعا ماما أحبطت من ردى خالص
بس ياريت ماما تعرف ان بقالى حياتى المستقله وانى مش لازم أقول كل حاجه وبعدين عاوزة ماما تتعود على الوضع ده علشان ما يحصلش مشاكل بعد كده

وحطيت السماعة والاقى التليفون بيرن مرة تانيه( واضح ان تليفونا هو الوحيد فى مصر!!! ) والاقى مكالمة مشابهة من حماتى وانهم برضه ح ييجوا بعد الضهر ( والدعوة عامة وحتبقى لمة !!! )

صحى احمد وهو مبسوووط اوووووى وقالى : ( صباح الفل يا حبيبتى اهو ده الصباح ولا بلاش .. بجد ملكة حتى وانتى صاحية من النوم )

ابتسمت له وقلت أسد نفسه بسرعة فقلت له ان كل العالم ح ييجى لنا بعد الضهر يعنى بعد ساعة تقريبا

ولقيت بيقول : يا ستى يشرفوا بس بجد مفروض ان الأهل يسيبوا العرايس شوية ياخدوا على الوضع الجديد وعلى الحياة الجديدة مش هجوم كده من أولها ماهم لسه سايبنا من كام ساعة ... حيكون حصل لنا ايه يعنى ؟ وبعدين انا ما نمتش طول الليل من شخيرك يا غاده!!!-

- شخيرى ؟ وكان ردى الحاسم ليه انى رميته بكل مخدات الشقه ولقنته درسا لن ينساه فى احترام حرمه المصون اللى هى أنا !!!

- يا ساتر يا رب ده انتى مفتريه الواحد ما يعرفش يهزر معاكى شوية ؟

غاده ترد بدلال
لا يا سيدى وتاج راسى ما عندناش رجالة يهزروا ... يالا تعالى نشوف ح نقدم للجماعة ايه ؟؟

ودخلنا المطبخ ولقيت احمد بيعملى احلى فنجان قهوه ممكن اشربه فى حياتى
بعدها بدانا نحضر الحاجات اللى هنقدمها للضيوف واعدنا ترتيب المنزل علشان الناس اللى ح تيجى تتفرج على الفرش الجديد وغيرت لبسى ولبست طقم جديد وحذاء بكعب عالى لأول مرة وربنا يستر واعرف امشى فيه ..... وخلاص بقى ح اعيش فى دور المدام ... ولقيت الباب بيرن ولقينا الاسرتين سوا مش عارفة ازاى ؟!!!!

ولقيت نفسى المفروض على أستقبل حوالى 18 فرد مرة واحدة ليه كده بس ؟ ما علينا المشكلة الأزلية ان الناس اللى بتيجى بتتفرج على كل الشقة حتى المطبخ يعنى مفروض ان اول ما الناس يشربوا حاجة أغسل الكاسات فورا علشان الفرجة تبقى كاملة .....

وهكذا وجدتنى تحولت الى نحلة مكوكية اشيل وأحط وأغسل وأفرج الزباين أقصد الضيوف على الشقة حتة حتة ومش عارفة ليه العروسة بتفتح النيش والدواليب وكل الفرش وكل الأطقم لكل واحد ييجى ؟؟؟؟؟؟؟؟ فعلا حرب مفروض الضيوف ييجوا يقعدوا فى الصالون فترة بسيطة ويلقوا نظرة سريعة على الفرش ويباركوا ويمشوا وخلاص وبلاش التفتيش الذاتى ده ... لكن تقول ايه الواحد كان اتجوز فى الصين أحسن !!!!

ايه الشغلانة دى ؟ ده بيت ابويا ما كانش زحمة كدة ؟؟؟؟ الناس دى ح تمشى امتى انا تعبت وغاده ياعينى ما قعدتش لحظة ولما جيت أشيل معاها الصوانى ماما قالت لى ( يعنى عمرك ما ساعدتنى يا احمد ؟!! ) الحمد لله ان غاده كانت فى المطبخ مش ناقصين نكد !!!!

وأخيرا أخيرا مشيوا وانا اكاد أبكى من التعب لأنى اصلا لسه تعبانة من مجهود الفرح حرام الظلم ده ..... ووجدت ماما تميل على وهى ماشية وتقول لى خلى بالك يا غاده من نفسك وماتتعبيش نفسك ( مش عارفة ازاى ؟)وعلى فكرة خالك وخالتك واولادهم جايين لكم بعد العصر شوية .......... وعمة احمد وجوزها واولادها جايين بالليل !!!!!!!!!!!!!!!!!!!!

حراااااااااااااااااااااااااااا ااااااااااااام

--------------------------------------------------------------------------------
الحلقه التالته

غاده.....
يااااااااااه دى فعلا حرب ايه كل المهنئين دول
انا حاسة انى كنت عانس مثلا ومصر كلها مش مصدقة انى اتجوزت فجايين يتأكدوا بنفسهم أحسن تطلع اشاعة !! ضيوف ضيوف ضيوف ....طول النهار والليل ومفروض أكون طول الوقت مستعدة ولابسة لبس فى منتهى الشياكة وكعب عالى حتى لو لطعونا ساعتين تلاتة مش مهم
وطبعا لازم البيت يبقى مفيش فيه ذرة تراب او طبق فى الحوض طوال اليوم علشان حملة التفتيش الذاتية وتكون النتيجة اننا مش عارفين نخرج ولا نتفسح ولا حتى الواحد يقعد على راحته حاجة تفلق !!!

ابو حميد.......
هو الجواز ح يطلع مقلب ولا ايه يا رجالة ؟؟؟؟؟ انا حاسس انى فى الصين الشعبية رجالة وستات والكارثة فى الاطفال اللى مش بيحلى ليهم أكل الشيكولاتة ومسح ايديهم الا فى الصالون اللى الواحد دافع فيه دم قلبه .. واللى يفرس أكتر موضوع الهدايا ده
كل واحد جت له هدية مش عجبباه يجى ويديهالنا وطبعا احنا كمان مش محتاجينها وقليل جدا الهدايا النقدية .. ده الواحد بقى على الحديدة من مصاريف الجواز والفرح وقلنا ح تفرج من نقوط الفرح يقوموا يدوها هدايا مالهاش لازمة ؟ ده الواحد كده مش ح يعرف يعمل منظر فى شهر العسل وشكلى مش هعرف أفسح غاده حبيبتى فى مكان كويس ؟ شكلها كده ح ترسى على شقة خالى فى الاسكندرية مع سلفة ابوية لا ترد .... وربنا يستروما تحصلش مشاكل !!!!!!!!

غاده.....
نقعت رجلى فى ميه وملح من كتر الوقوف وأخذت قرص مسكن وانا أعانى من علامات كساح مبكر ... وشيلت فيشة التليفون علشان محدش يتصل ويتحفنى بالخبر الميمون (انه جاى فى السكة!) وغمضت عينى ولقيت احمد بيحط ايده على جبينى وبيقولى :

- ( سلامتك يا حبيبتى من التعب ... معلش انا ح اريحك حالا ..
يالا قومى رتبى الشنط ح نسافر حالا !!! )

رديت زى ما يكون حاجه قرصتنى:
ايه أقوم ؟!!وكمان نسافر حرام عليك انا ح اموت خلااااااااااص انا مش ح اتحرك ابدا من هنا .

- يا حبيبتى مفيش حل تانى انا خلاص ح اتجنن من كتر الدوشة لازم نهرب من هنا ونستمتع بشهر العسل انتى ناسية اننا ح نرجع الشغل بعد أسبوع ؟

- طيب والفلوس يا احمد ؟

-ولا يهمك يا حبيبتى جوزك اتصرف جيب السبع ما يخلاش (قصدى جيب بابا !!)

-طيب والناس اللى عمالة تيجى دى حتيجى مش هتلاقينا ؟

احسن ... يبقوا يقعدوا مع البواب ... والله ده انا مسافر مخصوص علشان اهرب منهم ونكون انا وانتى وبس

- طيب مش أستأذن ماما وبابا الأول ؟

- قام بصلى احمد حتة بصه وقالى

( قومى دلوقت يا غاده حضرى الشنط حالا حنسافر بعد ساعة ....قبل ما أفقد أعصابى !!!)

- جريت بسرعه من قدامه علشان احضر الشنط بسرعه وانا مش عارفه فى ايه
علشان قلت أستأذن ماما و بابا طيب ما انا لسه مش واخده على دور المدام ده .. واضح انى متجوزة ااااااسد وانا مش واخدة بالى !!!!

- وفى العربيه أخدت بالى انى أول مرة أركب مع احمد بس المره دى
احمد جوزى احمد حبيبى و لوحدنا ومش قلقانه من اى حاجه خالص
كان احساس رائع والاجمل انى تركته هو يقود الدفة ويوجهنا زى ما هو عايز.............احساس جميل بالقاء المسئولية على الراجل وانتى تنعمى بالراحة والاطمئنان سبحان الله حتى القوامة للراجل اللى ممكن تزعل كتير من بنات حواء ما أجملها من احساس ... وغمضت عينى ونمت
وصحيت على نسيم الاسكندرية الرائع
واحمد بكل رقه بيصحينى زى الطفله الصغيره وبيقولى

(قومى بقى يا عروسة ... وصلنا خلاص .......)

وطلعنا الشقة ولقيتها صغيرة لكن مشرقة وجميلة وفضل احمد يفرجنى على جميع الغرف وخرجنا البلكونة لنستمتع بمنظر البحر الرائع.... ولكن
لقيت بنت جميلة وجذابة ذات شعر حريرى وقوام ممشوق فى مثل سنى تقريبا فى البلكونة المجاورة لنا تماما ندهت على احمد اول ما شافته وقالتله بدلال كبير :

( حمدالله على السلامة يا احمد مش كنت تقولى انك جاى ؟ .كده..... انا زعلانة منك !!!!)

ثم انتبهت أخيرا الى الحشرة الموجودة بجواره اللى هى انا وسألته سؤال ممزوج بغضب

( مين دى يا احمد ؟؟؟؟؟؟؟؟؟؟؟!!!!!!!! )

--------------------------------------------------------------------------------
الحلقة الرابعة

غاده
تنحت من المنظرواللى بيحصل .. ايه ده يا روميو زمانك ايه اللى انا شايفاه ده
مين دى ياحبيبى
لا وايه بتكلمه ولا كانه حبيبها و بكل دلال واستهبال لا وواضح ان الموضوع فيه ذكريات مشتركة بينهم.....
من اولها كده ياربى ؟ !
لا مقدرش كده كتير
حتى مش قادره اواجه احمد
حاسه ان كلامى هيكون خناقه لرب السما
وانا بقى مش عايزه الانسة المبجلة جارة الوادى انها تحس انى بتخانق مع احمد بسببها هى كده ممكن تحس بانتصار .... بصيت ل احمد حتة بصه
شرار طالع من عينى
غضب العمر كله كان موجود جوايا
سيبته ودخلت اوضة النوم وانا كلى مولعه من الغضب واقعدت اغرز ضوافرى فى المخده حتى كادت تتمزق من ضغط ايدى وانا أغالب الدموع بشدة .. جالى احمد وحط ايده برقة على كتفى وقالى بكل براءة ( مالك يا غادة في حاجة؟!! )
بصتله ومتكلمتش علشان لو كنت اتكلمت كنت قتلته
وشيلت ايده من على كتفى وصرخت فيه ( وكمان بتسأل مالك ؟ انا اللى عاوزة اعرف مين الهانم دى يا استاذ وازاى تكلمك بالدلع ده كله؟ وايه اللى كان بينك وبينها او يمكن لحد دلوقت كمان!!)

-رد بكل حنيه
ممكن تهدى يا حبيبتى

- طب يا سيدى ما تزعلش ايه اللى كان بينك وبينها .. يالا احكى ها اتكلم قولى اتحفنى انا نفسى اشوف فيلم رومانسى من زمان .... واوعى تقولى مفيش حاجة انا مش طفلة قدامك!!!

- رد وهو خايف على من الثوره اللى انا فيها

طيب ممكن تهدى نفسك علشان نعرف نتفاهم ؟

- رديت وانا ارتجف : مش ح اهدى الا لما تقولى ايه اللى كان بينك وبينها
- بداء احمد يتكلم بصوت هااااادى وحنين اوووى:

بصى انا هقولك على الموضوع من اوله لاخره

من غير ما احس لقيت دموعى بتنزل .... وأخدنى احمد بين أحضانه وهو يهدهدنى كطفله صغيره ترفض النوم ... وقالى :

الحمد لله انا عرفت دلوقت 3 حاجات
الاولى انك مجنونة
والتانيه انك بتحبينى جدا والا ايه لازمة الجنان اللى انتى عاملاه ده ؟

تالت حاجه ودى الاهم انك مفتريه

جيت أرد ولكن حط ايده على شفايفى بايده وقالى :

بصى ياغاده انا هقولك على كل حاجة بس لما تهدى الاول خالص ..
ممكن

- مسحت دموعى كالاطفال وانا اقول اتفضل احكى بس اياك تكدب !!!

- بصلى ومقدرش يرد على ومسح دموعى برفق وقالى : يا حبيبتى ما كنت كدبت من الاول
وضحكت عليكى وخلاص ... بصى يا ستى انتى عارفة ان دى شقة خالى من زمان جدا ومن واحنا اطفال واحنا بنيجى نصيف هنا وساعات بنقعد بالشهرين هنا وانتى شايفة ان الشقه فى وش الشقه وطبيعى جدا ح يكون لينا علاقة بالجيران وشيرين يا ستى بنت الدكتور محمود جارنا خريجة جامعه امريكيه ومدارس لغات وبنت مثقفة ودماغ و جميلة زى ما انتى شفتى..

- بقولك ايه بلاش الغزل ده قدامى متجننيش انتوا متفقين على ولا ايه ؟

- لا ياحبيبتى ده انتى حبى وعمرى كله والله ... المهم انا ياستى حسيت فى فترة من الفترات انى ميال ليها وهى كمان بادلتنى نفس الشعور بس عمرى ما حسيت انه حب
كل ما كنت اجى اخد خطوة ارجع خطوتين حتى انى مصرحتهاش ابدا بحبى لأنى ما تأكدتش ابدا من مشاعرى ناحيتها
ومحستش معاها ابدا بالاستقرار

غاده...
- مش عارفه ليه وقتها بعدت الغيرة الحارقة قليلا عنى وحسيت انى بتكلم مع اخويا وانتيمى وحسيت ان صاحبى بيكلمنى على مشكلة مش جوزى

هديت دموعى وانا حاسه بحرارة وصدق كلامه لأنه مكنش مضطر ان يقولى كل التفاصيل دى لو مكنش صادق
: طيب يعنى حبيتها بجد ؟

- رد بسرعه :

لا والله دا كان مجرد اعجاب مش حب والا كنت خطبتها .... انا ما حبتش حد فى حياتى الا مجنونة واحدة عمالة تعيط زى الاطفال!!

امال بتكلمك كده ليه زى ماتكون مراتك

- يا بنتى هى اسلوبها كده أعملها ايه يعنى ؟ خلاص بقى يا غاده
هو احنا نخلص من الضيوف تطلعلنا الست هانم دى ؟ سبحان الله ده انا سمعت عن شهر العسل ده حواديت الف ليلة وليلة ...
واضح انك اخدت مقلب يا واد يا احمد يا ريتك كنت اتجوزت شيرين!!!

- شيرين ؟! طيب روح لها بقى يا أخويا خليها تنفعك!!!

واقعدت ازقه بره الاوضه وقفلت الباب على نفسى من جوه وانا حاسه ان جبل انزاح من على صدرى وانى ضخمت الموضوع بغباء قبل ماعرف الحقيقة ... قد ايه الغيرة قاسيه وقد ايه ب أأأأأأعشق هذا الرجل بجنون !!

- افتحى يا غاده الله يهديكى ... يا بنتى افتحى انا تعبت ... طيب علشان خاطرى ... دا الضيوف أهون يا شيخة ... يا مجنونة افتحى ... طيب يا غاده خلاص براحتك انا ح انزل شوية بس خلى بالك الاوضه اللى انتى فيها دى كان دايما فيها فار !!!... باى يا حبيبتى بقى!!

- وطبعا فتحت الباب كالملسوعة وانا بصرخ الحقووووووونى فاااااااااار فاااااار
وجريت الحق احمد قبل ما يخرج ويسيبنى مع الفار !! وهى خطوة واحدة .. ولقيت نفسى بين دراع حبيبى وهو بيضحك
وووووو

وسكتت شهرزاد عن الكلام المباح تانى .............

شهر عسل بقى

--------------------------------------------------------------------------------
الحلقة الخامسة
غاده.....
منظر البحر ساحر والاحلى انى مع حبيبى ومش خايفه ان حد يشوفنى بالعكس انا نفسى الدنيا كلها تعرف انى عروسة فى شهر العسل وان احمد حبيبى هو جوزى من فرط سعادتى واحساسى بالراحة .. عدا على أجمل اسبوع فى حياتى كله فسح وخروج وسهر وحب فى حب ...مش عاوزة ابعد عن احمد ولا ثانية ....

احمد.....
فعلا لازم يسموه شهر عسل قصدى اسبوع عسل بس يا خسارة ده اخر يوم وهنرجع القاهره بكره... بصيت ل احمد لقيته سرحان وبيفكر... ياترى بتفكر فى مين يا احمد؟ فى شيرين ؟ مش معقول كفاية تفاهة بقى يا غاده واياكى تفتحى الموضوع ده اتانى ... انا ما صدقت انى كسبت نقطة وخليته يثق فى كصديقة عاقلة قبل ما اكون زوجة غيورة بس بجد كنت ح اموت من الغيرة ... بس يعنى لو صرخت وبوذت وخاصمته ح اخليه ينسى اى واحدة ومايبصش لواحدة غيرى مش ممكن طبعا ده ح يبعد عنى اكتر .... لا ياسى احمد ده انا ح اكون قدامك ووراك وجنبك وفى كل مكان حتى تحت جلدك ... انا هبقى لزقه فى كل حته فيك ده انا عاملالك حتة خطة الليلة دى مش ح تخليك تفتكر لا شيرين ولا سعدية وتحلف ان مفيش فى الدنيا بنت غيرى .... بس استنى على !!!!!

المصاريف خرمت خالص يا واد يا احمد !!! وباين علينا ح نقعد قدام المرسى ابو العباس نكمل الاسبوع ... فطار وغدا وعشاء برة البيت ده غير الفسح !! ماشاء الله على الشحاتة المتوقعة..الحمد لله ان العربية فيها بنزين ترجعنا مصر بكرة ان شاء الله وانا راجع لازم اعدى على بيت السيد الوالد طبعا علشان منحة ابوية تانية حاجة تكسف بجد .... بس الحقيقة كان اسبوع يجنن كان نفسى يبقى شهر دول العزاب دول غلابة ياعم!!! قال ويقولك محلاها عيشة الحرية !!! ده قصر ديل يا باشا !!

- ايه يا سى احمد انا ح اموت من الجوع وانت اخر طناش ايه خير ؟ انت ح تصوم الستة البيض من النهاردة ؟

- يا ساتر يارب مش انا لسه يا بنتى مفطرك من 10 ساعات
!!! ده انتى ح تاكلينا لما نروح !!

- ياباى على الغلاسة .. يابنى ح اموت من الجوع والناس اللى جنبنا دول ما بطلوش اكل من ساعة ما وصلوا وحتى الست صعبت عليها لما لقيتنا مدينها ترمس ولب من ساعة ماجينا قامت عزمت على بطبق محشى وانت بتصلى العصر ... بس انا عملت فيها العروسة الشيك وقلت لها ميرسى يا طنط ... يا خسارة المحشى !!!

- محشى ؟!! ياريتك جبتلنا طبقين ... دى الفلوس اللى معانا يادوب تأكلنا كشرى واحتمال مفيش عشاء كمان ... لازم يخلوا العرايس يطبخوا فى شهر العسل علشان العرسان ما تشحتش يا حبيبتى .

- طيب ح نموت من الجوع ولا ايه النظام ؟ فهمنى علشان اروح الحق طنط بتاعة المحشى بسرعة دول دخلوا فى المسقعة !!!

- لا يا ستى اخر وجبة ح ناكلها هنا وأمرى الى الله ح نروح ناكل فى مطعم قريب من البيت وبعدين بالليل فيه ناس قرايبنا هنا ابنهم عمل حادثة وح اضطر اروح أشوفه شوية ... تحبى تيجى معايا ولا بتخافى من المستشفيات ؟

- لا باخاف ...روح انت ... لان انا عاوزة أحضر الشنط وانام بدرى النهاردة معلش يا حماده ياحبيبتى لو جيت ولقيتنى نايمة ما تصحنيش علشان خاطرى ...

- ياسلام ؟ لا والله ؟ كده ياغاده... وتسيبينى أسهر لوحدى؟

- معلش يا احمد بجد تعبانة وعاوزة انام بدرى الظاهر خدت دور برد... ما تزعلش علشان خاطرى ...

لا يا حبيبتى خلاص ... انا عاوزك ترتاحى ... بس افتكريها !!!

-

-

-
-

اخيرا احمد مشى وراح المشوار بتاعه قدامى حوالى 3 ساعات علشان أرتب أجمل ليلة ح يعيشها فى عمره ... رتبت الشنط بسرعة جدا وكلمت حلوانى مشهور فى اسكندريةعلشان ااكد حجز تورتة حجزتها من امبارح على شكل قلب احمر ومكتوب عليها اسمي انا واحمد وعليها كلمة ( الى حبيبى ....أحبك !)

وطلعت صندوق المفاجات اللى كنت محضراه من القاهرة ومخلتش حد يبص عليه حتى ماما ...وطلعت منه مجموعة من الشموع الحمره والوردية ووزعتها فى الشقه كلها ... ومش هولعها الا لما يجى حبيبى ...

وكمان مجموعة من الورود المجففة الجميله وزعتها على الارض على شكل أسهم ل اوضة نومنا ... وكمان مجموعة من البطاقات الوردية والملونة واللى كتبت عليها عبارات غرامية لحبيبى ووزعتها فى كل الشقه بشكل مرتب ومتسلسل ...

بعد كده دخلت الحمام وأخدت شاور سريع ... ومليت البانيو بميه سخنه ورغاوى صابون منعشة ل احمد علشان لما يجى ونثرت فوق الميه مجموعة من القلوب الحمراء الطافية .. وكتبت على مراية الحمام بالروج بخط صغير ( كان أجمل اسبوع عسل فى العالم يا حبيبى ومجنونى ... )

بعد كده دخلت اوضة النوم ورتبتها ورشيت معطر جو مستخدمتوش قبل كده ومنستش الشموع طبعا ...ولبست طقم جديد ساحر كنت مخبياه ... ورشيت عطر رائع وقعدت احط المكياج بدقة شديدة وكأنى هتجوزالليله دى ....وبكده احمد مش بس هينسى شيرين لا هينسى الدنيا دى كلها الا انا ... يارب ارضى عنا ..

احمد بيركن العربيه تحت البيت الحمد لله اننا فى الدور الخامس وقدامى وقت لبقية الخطة ... حطيت التورتة فى الصالة وحوليها الشموع علشان يشوفها اول ما يدخل .... ورتبت البطاقات وطفيت نور الشقة كلها وسيبت باب الشقة مفتوح حته صغيره ودخلت استخبيت فى اوضة النوم

ايه يا غاده ده انتى نمتى وسبتى الباب مفتوح ؟ ربنا يستر ... ايه ا لنور مقطوع ولا ايه ؟ غادة انتى فين ؟ ايه ده ايه ده انا مش مصدق عينى ... مش ممكن ... الله الله لا يمكن انا اكيد فى حلم ... غاده انتى فين ؟ ايه التورتة الرهيبة دى ؟ يااااااااااااااه انا حاسس انى ملك .... غاااااااااده ...

وايه الكروت اللى على الارض دى ؟

اول واحد مكتوب فيه( ... لو كنت بتدور على اتبع الاسهم !!) ااه ده فيه اسهم بالورود على الارض كمان ايه الرقة دى ؟ ... واللى بعده مكتوب عليه ( حد يمشى ورا الاسهم برضه ؟ امشى ورا قلبك يا حبيبى وانت تلاقينى ..!! )
ودخلت الحمام لقيته متجهز لملك او امير بجد بحبك يا غاده... انتى فين يا حبيبتى ... اكيد هنا فى ااوضتنا وكمان كارت على باب الاوضه مكتوب عليه ( انا بااااااعشق احلى راجل فى الدنيا ... سيدى وتاج راسى ) ...
وفتحت الاوضه علشان الاقى غاده فى أجمل صورة ممكن اتخيلها .. أميرة نايمه وسط الشموع والورود ... هو ممكن زوجة ترضى جوزها وتسعده بالشكل ده
بجد انا مش مصدق

وسكت شهريار هذه المرة عن الكلام المباح !!!!!!!!!!!!!!!!

مش عايزين حد يحسدهم لو سمحتم يا جماعه

--------------------------------------------------------------------------------
الحلقة السابعة

غاده واحمد بعد ما رجعوا من الاسكندريه ووصلوا القاهره

... وصلنا البيت ومرضتش اصحى غاده الا لما افضى الشنط الاول من العربيه ... ووصلت الشنط للاسانسير بعد كده رحت ل غاده علشان اصحيها لقيتها بحلقت فيا وصرخت( انت مين ؟ انت خاطفنى ولا ايه ؟ ياااااحمددددددد ) وقبل ما تكمل وتفرج علينا الشارع ويفتكرونى خاطفها حطيت ايدى على شفايفها واستنيت لحد ما تتعرف على والحمد لله أخيرا فاقت وعرفتنى وسألتنى سؤال أغرب من الخيال(ايه ده يا احمد؟ ايه اللى جابنا فى الحتة المقطوعة دى ؟ )!!!!
-
-
-
-
-انا ح اموت من التعب لو رسمولى مخدة على الحيطة ح انام على طول !!! عاوزة انام حالا علشان بكرة الجمعة وبعده السبت حنرجع على شغلنا انا وانت يعنى بكرة يوم كله شغل وتجهيز أكل للأسبوع كله وتوضيب الشقة وأكيد ح نتعب بكرة أوى ...

- ح نتعب ؟ ايه الكلمة الغريبة دى ؟ وانا مالى ؟

- مالك ازاى ؟ مش احنا اتفقنا نتشارك فى كل حاجة ؟

- ايوه يا حبيبتى بس مش من اول يوم
وبعدين انا نفسى اكل من ايدك فى اول يوم
وعايز احس انى سى السيد ولو ليوم واحد (بيحرجها)
اقولك حاجه
انا هعملك احلى فنجان قهوه اول يوم
وبعد كده اللى تطلبيه عيونى ليكى
اتفقنا

- كده يا احمد ؟

- حبيبتى .. النهارده بس...

ياااااااااسلام على رواقة الرجالة وحبيبى حماده بالذااات

بعد الغداء

احمد عملى احلى فنجان قهوه خلانى مش عايزه حاجه من الدنيا دى غير حبيبى وفنجان القهوه
بعدها قالى انا نازل اقابل صحابى وبعدين ح هعدى على ماما واحتمال اتاخر !!!

بعد احمد ما نزل.....

طيب انا مفروض أعمل ايه دلوقتى بالظبط ؟ أنا الاول أرتب الشقة لأن التراب من قفلتها أسبوع يترسم عليه خرايط ولسه ح افضى الشنط وأغسل الهدوم اللى كانت معانا فى اسكندرية وبعدين أطبخ كذا صنف أشيلهم فى الفريزر علشان يكفوا الاسبوع كله ...

يارب يخليكى لينا يا ماما كنتى شايلة الهم ده كله عنى وانا كنت اتنح قدام التليفزيون ولا أرغى فى التليفون وخلاص ... والاهم ان معلوماتى عن الطبيخ محتاجة مترجم يفك رموزها ربنا يستر!!
طيب انا أحط اللحمة تتسلق الاول علشان بتاخد وقت وبعدين أشغل الغسالة ... بس لازم البس جوانتى علشان ريحة البصل علشان احمد لما ييجى ...طب وليه ... خليه يشم البصل مش هو اللى سابنى فى الحرب دى يستحمل بقى !!!...

-هى اللحمة شكلها غريب كده ليه ؟ ... طيب مش مهم أعمل ايه تانى؟ مسقعة ؟ ياسلام ده انا باموت فيها بس عمرى ما شفت ماما بتعملها ازاى؟ هى فيها باذنجان وحاجات تانية غريبة !!!..............يامااااااااما الحقينى وجريت كلمتها على التليفون وقعدت تهزأ فيا الاول و انها ياما قالتلى اتعلم ومفيش فايدة الخ الخ الخ المهم انها قالتلى الطريقة مع استخدام الفاظ غريبة ( تعملى اللحمة ع الصاج الاول !!! ) رديت بسذاجه عليها
اجيب منين صاج دلوقتى ياماما ؟ وطبعا سمعت تريقه مسمعتهاش فى حياتى قبل كده وكمان بالصبر ل حبيب القلب احمد !!!

وطالت المكالمة ساعتين وماما بتشرحلى و كان كلامها كله طبيعى ومفهوم وانا من كتر التريقة اللى خدتها مسالتش على حاجات كتير وقلت أعتمد على خيالى الخاص !!!!
وتوكلت على الله وبدأت المعركة الحقيقية أضرب الطماطم لا أسلق المكرونة الاول ..............
طيب أقطع البطاطس شرايح ولا قطع
انا باقول مثلثات وخلاص !!!
ايه حدوتة الملوخية دى كمان لازم أقعد أخرطها ساعتين.... لا ههريها فى الكبة وخلاص بس مش عارفة ليه اتكورت فى قاع المحيط كده قصدى الحله ؟

صينية البطاطس حطيتها فى الفرن بس حاسة انى نسيت حاجة فيها هى ايه مش عارفه بس هى متحجره كده ليه مع انى حطاها بقالها ساعه ونص فى الفرن ومع انها اتحرقت من تحت بس مش عارفه من فوق حجاره كده ليه
دى ليمكن تكون بطاطس
ياربى ايه الوقعة دى كان مالى انا مانا كنت اميرة زمانى واخر رواقة ... خلاص اللى اتعمل اتعمل طيب لو احمد اتكلم ؟؟؟؟؟؟؟...

ييييييييييييييييه انا نسيت الغسيل طلعت البلكونة أنشره وقعدت أفتكر ايه اللى بيتنشر الاول وايه اللى ورا ؟ طيب ايه من رجله وايه من قفاه ؟ ايه الفيلم ده دول الستات دول ناس رايقة ما كله ح ينشف وخلاص ولاحظت وجود ست أروبة فى البلكونة اللى قدامنا بتراقبنى علشان تشوف العروسه الشملوله اللى هى انا ح تنشر ازاى ؟ ولا همنى من بصتها وعملت كرنفال من الهدوم ابيض على احمر على اخضر.... واديله المهم ينشفوا وخلاص ... بلا وجع قلب !!!

ورجعت للكارثة الموجودة فى المطبخ ودوقت اللى طبخته
وصرخت ياللهووول على رأى يوسف وهبى!!! طيب والحل وفتحت الفريزر لقيت ماما حبيبتى وكأنها عارفة المصيبة اللى ح أعملها وحطت كمية كبيرة من اكياس الهامبورجر والفراخ النص مقليه والطبخات السريعة الحمد لله
كنت ح أطلق وانا لسه فى شهر العسل !!

يااااخبر ده احمد بيرن على الموبيل يبقى هو فى الطريق وطبعا لبسى ميتوصفش من القنابل اللى كنت باعملها فى المطبخ كرنفال من البصل والثوم والزيت ...لميت الكوارث اللى عملتها وحطيتها فى الثلاجة وجريت على الحمام وشيلت اثار العدوان وغيرت لبسى...

ودخل احمد وبسرعة عملت نفسى مقموصه وزعلانه على غلاسته معايا قبل ما ينزل وان سابنى من غير ما يساعدنى واستنيت ان يصالحنى كالمعتاد بس مفيش فايده.... بس لاحظت انه تعبان اوى وبيتنفس بصعوبة فجريت عليه وقلتله ( مالك يا حبيبى ... انت تعبان ؟) واقعدت أمسح عرقه وأسقيه ميه وانا هنهار ( وأقوله انشاالله انا وانت لا يا حبيبى ) وانا ماسكة ايده الضعيفة وفجأة ... شدنى عليه وضحك بصوت عالى وقالى

لما انتى بتموتى فيا كده عامله مقموصه ليه
ووووووووووو

وسكتت شهريار عن الكلام المباح

شهر عسل يا جماعه ياريت مننساش

لا بجد تهبل عقبال فرحى و شهر عسلى يارب يا رب

» اغانى عربيه جنااان هتعجبكم
» لعبة حلوة هتعجبكم (حوض الماء الحار)
» يوميات اشقى بنات
» يوميات الرجل السبع بالصور